Infana Verbo-Verva Alfabeto

Ne por-infana, sed pri-infana
Por gepatroj nunaj kaj potencialaj

Je A mi aperas
Vers-verŝo-prete,
La poem’ po-literas
Tut-alfabete.

Je B mi balancas
En arb’ sur la branĉ’,
Sentime mi prancas
Ĝis suben la lanĉ’.

Je C mi celebras
Naskiĝtagfeston,
Donacoj tre nepras
Kaj amasan ĉeeston.

Je D mi demandas
Dekfoje minute,
Scivolo tre grandas
Patrin’persekute.

Je E mi elanas
Poŝmonon meriti,
Sed samtempe vanas
La taskojn eviti.

Je F mi forgesas
Litĉambran mastrumon,
Refoje promesas
Morgaŭan plenumon.

Je G mi gitaras
Amplifikate,
La sono tre klaras
Mult-megaŭate.

Je Ĝ mi ĝentilas
Dum vizit’ de l’avin’,
Taktike utilas
Por donac’ en jarfin’.

Je H mi helpadas
Manĝigi la hundon,
Ĝi laŭte jelpadas
Se vidas uj-fundon.

Je Ĥ mi ĥaosas,
Ludila amas’
La ordon subfosas,
Ne eblas trapas’.

Je I mi imagas
Pri mi aventura,
Heroe mi agas
En danĝer’ - sed sekura.

Je J mi junaĝas
Do mi dorlotenda,
Mi multe kuraĝas
Nur ĉarme pretenda.

Je Ĵ mi ĵaluzas
Pri donaco gefrata,
Mi silenti rifuzas
Ĝis sam’ ricevata.

Je K mi karesas
Vost-al-kape la katon,
Pacienco ekĉesas...
Rikoltas mi graton.

Je L mi laboras
Pri najlo-batad’,
Kiom rigoras
Martela agad’!

Je M mi makulis
Fest-vestojn pro kuko,
Prudento postulis
Surmeton de tuko.

Je N mi ne diros
Kion ĵus mi fuŝ-faris,
Apenaŭ mi spiros
Ĝis ĝin mi riparis.

Je O mi orgojlas
Ĉe hejma spegul’,
Vizaĝe gargojlas
Ĉu vere vantul’?

Je P mi petolas
Ĝis post nokto-mezo,
Kiom longe mi volos
En laca frenezo.

Je R mi rifuzas
Ordon’ enlitigan,
Pretekste mi ruzas
Per tromp’ plu-ludigan.

Je S mi silentas
Ĉar venis la dorm’,
Sed pac’ nur momentas:
Brueg’ – jen la norm’.

Je T mi trodormas;
Per traporda paf’
– la hasto enormas –
Lernejbusa traf’.

Je U mi ululas
En indian-stil’...
ke...
Mi dume cirkulas
Sed bilardo-pilke.

Je Ŭ mi ŭaŭaas
Pro tim’, etul’ mi,
La hund’ nur ĉiŭaŭas
Sed monstras des pli.

Je V mi vomemas;
pro kuk-tro-frand-MIS,
kaj nun mi dilemas
Ĉu al marcipan’ "Ĝis!"?

Je Z mi zefiras...
En liton mi plonĝos,
Al dorm’ mi briz-iras
Bub-revojn mi sonĝos.

Stefan MacGill, 2001
Neniam aperis en Juna amiko.